Беларусь будзе канкурэнтаздольнай на рынку не толькі вайсковай, але і цывільнай мікраэлектронікі праз 25 гадоў, паабяцаў Аляксандру Лукашэнку намеснік старшыні Усебеларускага народнага сходу Аляксандр Косінец на паседжанні УНС 19 снежня.
Аляксандр Лукашэнка адзначыў, што ў нашай краіне надаецца шмат увагі гэтай сферы.
— Дзякуючы вашай падтрымцы і таму, што гэтая галіна знаходзіцца ў эпіцэнтры вашага зроку, цягам 25 гадоў мы будзем канкурэнтаздольныя на сусветным рынку не толькі вайсковай, але і цывільнай мікраэлектронікі, — паабяцаў Косінец.
— Колькі гадоў? — здзівіўся Лукашэнка.
— 25 гадоў.
— О божа. Нас з табой не будзе. Калі можна, Аляксандр Мікалаевіч, трохі менш, каб мы хоць паглядзелі на гэты цуд.
У адказ Косінец паабяцаў, што прамежкавыя вынікі працы беларускіх навукоўцаў можна будзе заўважыць ужо да 2030 года.
