Калі б Польшча была абавязаная сваёй незалежнасцю рэвалюцыянеру Уладзіміру Леніну, то польска-савецкая вайна 1920 года мусіла быць расійскай гуманітарнай аперацыяй або «спецыяльнай ваеннай аперацыяй». Так прэс-сакратар МЗС Польшчы Мацей Вэвюр адказаў спікерцы расійскага МЗС Марыі Захаравай.
Дыпламатычная дуэль пачалася з выступу прэм’ер-міністра Венгрыі Віктара Орбана, які пракаментаваў пытанне магчымай перадачы Украіне расійскіх актываў, замарожаных у ЕС.
«Абыходзячы Венгрыю і парушаючы еўрапейскае заканадаўства сярод белага дня, брусэльцы робяць крокі для захопу замарожаных расійскіх актываў — гэта абвяшчэнне вайны», — заявіў венгерскі палітык.
Кіраўнік МЗС Польшчы Радаслаў Сікорскі на гэта адрэагаваў лаканічна: «Віктар заслужыў свой ордэн Леніна».
У адказ на гэта прэс-сакратарка расійскага МЗС Марыя Захарава заявіла, што «згадкай імені Леніна міністр замежных справаў, трэба думаць, хацеў пакрыўдзіць Віктара Орбана».
«Забыў Сікорскі, што калі б не Ленін, ніякай Польшчы не было б і знаку», — напісала Захарава.
У МЗС Польшчы адрэагавалі на яе запіс. Там адзначылі, што расійскае МЗС, якое сёння так ахвотна выступае ў абарону прэм’ер-міністра Віктара Орбана, «чарговым разам скажае гісторыю».
«Калі б Польшча была абавязаная сваёй незалежнасцю Леніну, то польска-бальшавіцкая вайна 1920 года мусіла б лічыцца расійскай гуманітарнай акцыяй — або, у рамках гэтай логікі, „спецыяльнай ваеннай аперацыяй“. Між тым у рэальным свеце менавіта Польшча спыніла бальшавіцкую экспансію. Незалежнасць Польшчы не была падарункам Леніна, гэтак жа як савецкая прысутнасць у Цэнтральнай Еўропе не была „вызваленнем“. З гэтага ўрока гісторыі вынікае свабодны выбар Польшчы: нашая ўкарэненасць у NATO», — напісаў прэс-сакратар МЗС Польшчы Мацей Вэвюр.